Miarahaba antsika rehetra !
Anjaran’ny “Fiombonan’ny Pretra sy Relijiozy” ny nanomana sy nanentana ny litorjia tamin’ny 9 marsa 2025 teo ; alahady voalohany amin’ny karemy. P. Mamy no nitarika ny sorona masina niaraka tamin’ireo pretra vitsivitsy : Joslin, Fulgence, Eugène, Pascal. Fra Sylvain sy Mr Silvestro no teo amin’ny fitendrena ny zavamaneno. Nisy ny fanosorana ny lavenona ho an’ireo izay tsy afaka nanao izany tamin’ny “alarobian’ny lavenona”. Misaotra antsika rehetra tonga niaraka nivavaka.
Amin’ny 16 marsa 2025 izao indray dia anjaran’ny M.D.M.K. ny manomana sy manentana ny litorjia. Ny ELVIR kosa no mitady fotoana handiovan’izy ireo ny fiangonana san Macuto-Bellarmino ho an’ny volana avrily 2025. Eto dia isaorana ny “Fiombonan’ny Pretra sy Relijiozy” nandio tamin’ny alahady teo.
Ny alahady 23 marsa 2025 izao no hanaovantsika ny “récollection” fiomanana amin’ny Paka. P. Pascal no hifampizara amintsika ny taratasy mirakitra ny “hafatry ny Papa Fransoa ho an’ny karemy 2025”, izay azontsika vakiana dieny izao. “Andao hiara-dia ao anatin’ny fanantenana”. Ao San Macuto-Bellarmino no hanaovantsika izany ary mbola homena antsika eto ny fandaharam-potoana mandritra ny vavaka.
Tsara ho fantatra momba ny taon-jôbily :
Þ Daty roa no efa nampitaina tamintsika teto fa iarahan’ny “aumôneries” (Ankohonana) rehetra misy ato anatin’ny diosezin’i Roma. Ny voalohany dia ny 27 avrily 2025 : lamesa iarahana amin’ny Papa eo amin’ny Piazza san Pietro ary nanomanana solontena 50 avy amin’ny Ankohonana rehetra handray ny sakramentan’ny Fankaherezana. Noho ny fahasahiranana vokatry ny tsy fahasalaman’ny Papa Fransoa dia nofoanana izany. Ny faharoa kosa dia ny 1 jiona 2025. Toy ny teo aloha ihany, fandaharana iombonan’ireo Ankohonana rehetra misy ato amin’ny diosezin’i Roma. Hisy ankizy solontena 50 hanao komonio voalohany eo amin’ny Piazza San Pietro. Ity faharoa ity dia mbola tazomina tsy misy fiovana ny fandaharana.
Þ Nivory tany amin’ny diosezy (Laterano) ireo aumôniers ny zoma 7 marsa 2025. Nangataka ny fandraisana anjaran’ny “aumôneries” rehetra amin’ny “Giubileo dei Migranti” ny “Dicastero per lo Sviluppo Umano Integrale”. Ny jôbily dia hatao ny 4-5 oktobra 2025. Ao Vatican sy ny manodidina no hanaovana ny fandaharan’ny jôbily. Mbola ho azontsika ny antsipirihan’ny fandaharana fa omeko amin’ny ankabobeny ny fandaharana ny alahady 5 oktobra 2025 : Lamesa ao amin’ny vatican ny maraina, mitohy amin’ny sakafo (samy mitondra zavatra hohanina) ; ny tapany hariva fampisehoana an-kalamanjana ao amin’ny Piazza del Risorgimento. Eto indrindra no mila manomana Gropy ny Ankohonana rehetra na dia mbola lavitra aza ilay izy. Hodinihintsika noho izany ny handrafetana ny Ekipantsika hiatrika izany fampisehoana izany (hetsika koltoraly). Ny masontsivana nangatahina dia mba ho Gropy maneho ny endriky ny Ankohonana sy ny Malagasy (Groupe représentatif).
Þ Nanapaka ihany koa ny komity fa hanao jôbily manokana ny Ankohonana amin’ity taona ity. Ny fomba sy fotoana hanaovana azy dia mbola hodinihina miaraka.
Izay àry fa dia mirary herinandro sambatra ho antsika.
P. Pascal, sj