Miarahaba antsika rehetra indray !
Isaorana isika mianakavy niara-nivavaka tamin’ny alalan’ny sorona masina tao amin’ny “Chiesa San Macuto-Bellarmino” tamin’ny alahady 2 marsa 2025 teo. P. Pascal no nitarika ny sorona masina, niaraka tamin-dry môpera isany : Eugène, Désiré ary Joslin. Ny “Ekipa sôlida” no nanomana sy nanentana ny litorjia ; I Hervé no nitendry ny zavamaneno.
Ny tolakandron’io alahady io, araka ny fanasana azon’ny Ankohonana Rasoamanarivo, dia maro no tonga tany amin’ny fankalazana ny faha-50 taonan’i Mma Anna. Mankasitraka antsika noho izany ny tompom-pety.
Nanasa antsika koa ny VOMM FJKM Roma tamin’ny fandraisan’izy ireo an’i Rév. Doc. Irako Andriamahazosoa Ammi, Filohan’ny FJKM sady ao amin’ny FFKM foibe, ny alatsinainy 3 marsa 2025 tao amin’ny via quattro novembre teto Roma, nanomboka tamin’ny 6 ora sy sasany hariva. Mankasitraka antsika izy ireo noho ny fanotronana sy ny fiombonantsika tamin’izy ireo.
Anjaran’ny “Fiombonan’ny Pretra sy Relijiozy”, izay hosoloin’ny “Famiglia salesiana” tena, ny manomana sy manentana ny litorjia amin’ny alahady izao. P. Mamy no hitarika ny sorona masina. Marihina moa fa alahady voalohany amin’ny karemy io. (hisy fanosorana lavenona). Amin’io andro io koa no handiovan’izy ireo ny fiangonana san Macuto-Bellarmino. Isaorana azy ireo mialoha.
Amin’ny alahady 23 mars izao no hanaovantsika ny “recollection” fiatrehana ny karemy, hiomanantsika amin’ny fandraisana ny Paka 2025. Ao amin’ny “Chiesa san Macuto-Bellarmino” no hanaovantsika izany. Homena antsika miandalana eo ny antsipirihany.
Farany, rahampitso ny alarobian’ny lavenona ka aza hadino ny mamonjy lamesa sy mihosotra lavenona ho an’izay rehetra afaka.
Mirary herinandro sambatra ho antsika.
P. Pascal, sj